Esta semana, a Serra de Outes acolle unha nova modalidade deportiva que combina actividade física e respecto polo medio ambiente. Trátase do plogging, coñecido en galego como corre-colle, unha práctica que consiste en recoller lixo ou retirar especies invasoras mentres se trota (jogging) ou camiña por un entorno natural.

O proxecto ReNatur será o encargado de organizar a primeira sesión desta iniciativa o vindeiro domingo 16, coincidindo co Trail de Outes. A actividade contará con premios en dúas categorías –trote e paseo– e está aberta a persoas de todas as idades e condicións físicas, incluíndo acompañantes do evento deportivo.

A sesión dará comezo ás 9:30 horas diante da Casa da Cultura de Outes. As persoas interesadas poderán inscribirse no momento, simplemente acudindo uns minutos antes do inicio e elixindo unha das dúas modalidades dispoñibles.

Como preparación, o proxecto #proxectoRenatur_Outes organizou unha sesión previa de aquecemento o venres 14, de 11:00 a 13:30 horas, tamén con saída desde a Casa da Cultura.

Esta iniciativa busca promover un estilo de vida saudable á vez que fomenta o coidado do medio natural, convertendo o deporte nunha ferramenta para a concienciación ambiental.