Noia, 7 de abril de 2025 – Tras anos de reclamacións ignoradas por parte do goberno municipal, a Asociación de Nais e Pais do CEIP Alexandre Rodríguez Cadarso ve por fin atendida unha das súas demandas históricas: a instalación dunha pérgola na entrada do centro, na zona da Barquiña.
A nova estrutura permitirá resgardarse da chuvia durante as entradas e saídas do colexio, un problema que levaba tempo afectando ás familias e ao alumnado, especialmente nos días de mal tempo. A ANPA leva anos solicitando esta mellora básica, sen obter resposta ata agora.
A presión exercida pola comunidade educativa foi determinante para que o executivo local, encabezado por Santiago Freire, finalmente acometese esta actuación. Dende a ANPA lembran que non se trata dun luxo, senón dunha necesidade evidente nunha vila como Noia, onde as condicións climatolóxicas fan imprescindible un espazo cuberto para agardar polos nenos e nenas.
Porén, desde a ANPA e boa parte da veciñanza critícase que esta medida chegue tarde e só despois de múltiples peticións ignoradas ao longo dos anos.
Con esta instalación, a comunidade educativa do CEIP Alexandre Rodríguez Cadarso acada unha vitoria parcial, aínda que segue vixiando para que non se repitan os atrasos e a falta de resposta institucional ante demandas tan básicas como esta.
Diario de Noia 