Noia, abril de 2025 – As Festas de San Marcos xa están ás portas, e Noia prepárase para vivir unha das citas máis queridas do seu calendario. Este ano, o programa mantén os piares clásicos da celebración: feira cabalar, música tradicional, actividades infantís e verbenas para todos os públicos. Iso si, sen grandes sorpresas nin nomes estrela, o cartel deste 2025 parece apostar pola prudencia e a continuidade.
O venres 25, día grande, celebrarase a tradicional Feira Cabalar e de Maquinaria Agrícola en San Lázaro, con concursos morfolóxicos e exhibicións de doma, nunha cita que sempre atrae tanto a profesionais como a curiosos. A música da noite correrá a cargo da orquestra Finisterre e a Disco Móbil CDC, nunha proposta que, aínda que solvente, non apunta a grandes multitudes nin ao impacto doutras edicións recentes.
O sábado 26, a programación combina música e deporte. Haberá boxeo e kickboxing no pavillón Agustín Mourís, e para a rapazada, inchables na praza do Curro. Pola noite, subirase ao escenario Panorama City, nome que pode dar lugar a confusión —non é a famosa Panorama, digamos que a marca branca—, seguida das actuacións de Black Black e Chocolate Disco Móbil. Unha noite completa, aínda que lonxe do despregamento doutras épocas máis ambiciosas.
O domingo 27, a música tradicional toma o protagonismo coa VIII Foliada, que reunirá grupos como Cherumia, Falcoeira, Nunca é Tarde ou Jait@s Blue en distintas prazas da vila. A xornada pecharase cun concerto da banda de música tradicional na praza do Curro e a verbena final na Alameda con New York.
En resumo, San Marcos 2025 promete manter viva a esencia da festa, con propostas para todas as idades e un ambiente animado. Iso si, moitos xa comentan que a programación deste ano semella algo máis contida, quizais por non coincidir con ano electoral. Sexa como for, Noia volverá vestirse de festa… aínda que con menos lús que noutras edicións.
Diario de Noia 