Muros, 13 de abril de 2025 – O pasado domingo, durante o encontro disputado no campo Eleuterio Balayo entre o CD Muros e a UD Monte Louro, o partido viuse marcado por un lamentable episodio de insultos homófobos, segundo denunciou publicamente nas redes sociais o xogador da UD Monte Louro, Iker.
Segundo o relato do futbolista, os feitos ocorreron durante a primeira metade do encontro, cando recibiu comentarios ofensivos de carácter homófobo por parte do capitán do CD Muros, Javi (nº 5). “No ano 2025 hai quen segue crendo que o fútbol é un espazo onde o odio non pode quedar impune”, escribiu Iker, quen expresou que máis aló do insulto en si, “o que ofende é a ignorancia, a covardía e o odio disfrazado de carácter competitivo”.
A situación foi comunicada no descanso ao corpo técnico da UD Monte Louro e ao colexiado. Segundo indica Iker, o apoio do seu equipo foi inmediato, ata o punto de que se chegou a propoñer non continuar o partido. Tamén destacou a actitude de certos xogadores do CD Muros que, tras rematar o encontro, se achegaron a amosar o seu apoio e solidariedade.
Cómpre salientar que o presidente do CD Muros entrou no vestiario visitante ao final do partido para pedir desculpas polos feitos, asegurando que ese tipo de comportamentos non representan os valores do club. Iker agradeceu o xesto, pero fixo un chamado público para que se adopten medidas claras e contundentes: “Non facer nada sería un paso atrás”.
O caso podería chegar agora aos comités competentes da Federación Galega de Fútbol, á espera de que se abran dilixencias se se presenta denuncia formal.
Nun deporte que debería ser exemplo de inclusión, compañeirismo e respecto, episodios coma este seguen poñendo de manifesto a necesidade de actuar con firmeza diante de calquera forma de discriminación.
Diario de Noia 