Noia, 18 de abril de 2025 — A formación Marea de Noia vén de lanzar unha dura crítica contra o alcalde Santiago Freire, ao que acusan de obstaculizar o debate democrático ao rexeitar incluír dúas mocións na orde do día do pleno municipal. Segundo denuncian, trátase de propostas «fundamentais para o futuro de Noia», presentadas en tempo e forma, que levan máis dun mes agardando por ser debatidas.

A primeira moción reclama a municipalización e mellora do Servizo de Axuda no Fogar (SAF), un servizo esencial para moitas familias noiesas, que desde a Marea consideran que precisa unha xestión directa para garantir a súa calidade e eficacia. A segunda proposta rexeita a construción dun macroaparcadoiro en Labarta, promovendo no seu lugar un proxecto alternativo que aposte por un espazo verde para as persoas e unha reorganización racional e sostible do paseo marítimo.

“A Santiago Freire non lle gusta a democracia participativa”, sentencian desde a Marea, denunciando que mentres as súas propostas son ignoradas, as doutros grupos si se admiten a trámite. Ante esta situación, a formación asegura que levará ambas mocións ao pleno por vía de urxencia: “Non imos permitir que se cale á Marea de Noia, nin que se impida o debate de propostas que afectan directamente á veciñanza”.

Con lemas como «Por unha Noia para vivir, non para especular», Marea de Noia insiste na necesidade de apostar por un modelo de vila sostible, pensado para as persoas e non para intereses especulativos. A tensión política continúa a medrar no consistorio noies, mentres a oposición reclama transparencia, participación cidadá e respecto polas normas democráticas.