A situación é insalubre en varios puntos da vila mentres o alcalde segue sen dar explicacións.
Noia, 29 de abril de 2025. A veciñanza de Noia amosa o seu malestar pola acumulación masiva de lixo nos colectores da vila logo da celebración das festas de San Marcos. En imaxes difundidas nas redes sociais e medios locais, pode verse como os colectores, especialmente os destinados a envases e residuos orgánicos, están desbordados, con bolsas amontoadas arredor e un forte cheiro que afecta á calidade de vida dos residentes.
«É vergonzoso que despois das festas isto quede así durante días. Non é a primeira vez que pasa», afirma unha veciña da rúa onde se captou unha das fotografías máis comentadas. A situación prolongada pode derivar en problemas de salubridade pública, ademais de ofrecer unha mala imaxe tanto para visitantes como para os propios residentes.
Mentres tanto, o alcalde Santiago Freire non se ten pronunciado sobre esta problemática. A falta de resposta por parte do Concello, organismo competente na xestión dos residuos, está a xerar indignación entre a cidadanía, que reclama unha solución urxente e unha planificación máis eficaz para eventos multitudinarios.
A veciñanza esixe máis responsabilidade e celeridade na recollida do lixo, así como unha maior presenza de servizos de limpeza durante e despois das festas.
Diario de Noia 