Noia viviu unha fin de semana multitudinaria na que o bo tempo e unha coidada organización foron determinantes para o éxito dos distintos eventos celebrados na vila, que reuniron a centos de veciños e visitantes.
A programación arrancou o venres co acendido das luces de Nadal, un acto que congregou a máis de 1.200 persoas. A xornada estivo acompañada dunha agradable climatoloxía, que favoreceu a asistencia e o ambiente festivo. O público puido desfrutar dunha degustación de chocolate con churros, da actuación da Coral Polifónica e dun emotivo momento co encendido das luces, protagonizado pola asociación pro saúde mental A Creba.
O sábado foi a quenda do deporte, co torneo de balonmán celebrado nunha pista instalada para a ocasión na rúa. A boa organización do evento, xunto coas condicións meteorolóxicas favorables, permitiu un alto nivel de participación e unha excelente resposta tanto por parte dos equipos como do público asistente.
A fin de semana pechouse coa recuperación da Festa do Berberecho, que levaba varios anos sen celebrarse. O evento superou todas as expectativas ao servirse un total de 2.400 racións, consolidándose como un dos grandes atractivos gastronómicos da comarca.
Desde a organización destacan o esforzo coordinado das entidades colaboradoras e do Concello, así como o comportamento exemplar do público, factores que, xunto co bo tempo, fixeron posible un balance moi positivo desta intensa fin de semana en Noia.
Diario de Noia 